ނައިފަރު ކައުންސިލުން ތަރައްޤީކުރި ދަތުރުވެރިންގެ ހިޔާ ކުލަގަދަ ރަސްމިއްޔާތަކާއެކު ރަސްމީކޮށް ހުޅުވައިފިއެވެ. މިހިޔާ ހުޅުވައިދެއްވީ ނައިފަރު ކައުންސިލްގެ މެމްބަރުންނެވެ. މިހިޔާ އަކީ ކައުންސިލްގެ ބަޖެޓުން ޚަރަދުކޮށްގެން އިމާރާތް ކުރެވުނު ހިޔާއެކެވެ. މިހުޅުވުނު ދަތުރުވެރިންގެ ހިޔާގައި ދަތުރުވެރިން މަޑުކޮށްލާނެ ޖާގައަކާއި ނަމާދު ކުރެވޭނެ ކޮޓަރިއަކާއި ޅަދަރިމައިންގެ ކޮޓަރިއަކާއި 2 ފާހާނާގެ އިތުރުން މުވައްޒަފުންނަށް ހާއްސަ ބައެއްވެސް ހިމެނެއެވެ. އަދި ބޭރުގައި މަޑުކޮށްލައިގެން ތިބުމަށް 4 ޖޯލިފަތިވެސް ބެހެއްޓިފައިވެއެވެ.

އަދި މީގެ އިތުރުން މިރަސްމިއްޔާތުގައި ނައިފަރު ކައުންސިލްގެ އައު ވެބްސައިޓްވެސް ވަނީ އިފްތިތާޙް ކޮށްފައެވެ. ވެބްސައިޓް އިފްތިތާޙް ކޮށްދެއްވީ ނައިފަރު ކައުންސިލްގެ ސެކްރެޓަރީ ޖެނެރަލް މޫސާ ޙަމީލްއެވެ. 

ނައިފަރުގައި މިހުޅުވުނު ދަތުރުވެރިންގެ ހިޔާ އަކީ ނައިފަރު ރައްޔިތުން ގިނަ ދުވަސްތަކެއްވަންދެން ކުރަމުންއައި ބޮޑު އިންތިޒާރެއްގެ ފޮނި ނިމުމެކެވެ. މިހިޔާގެ ސަބަބުން ރަށަށް އަރާ ފައިބާ އެތަކެއް ރައްޔިތުންތަކަކަށް އޭގެ ފައިދާއާއި ލުއިފަސޭހަކަން ލިބިގެންދާނެއެވެ. 

ނައިފަރު ކައުންސިލުން ތަރައްޤީކުރި ދަތުރުވެރިންގެ ހިޔާ ހުޅުވައިފި

މިއަހަރުގެ އިސްރަށްވެހިންގެ ދުވަސް ނައިފަރުގައި ފާހަގަކޮށްފިއެވެ. އިސްރަށްވެހިންގެ ދުވަސް ފާހަގަ ކުރުމުގެ ގޮތުން ނައިފަރު ކައުންސިލާއި ބައެއް މުއައްސަސާތައް ގުޅިގެން އިސްރަށްވެހިންނަށް އަމާޒުކޮށްގެން މޫދު ކަސްރަތު ޕްރޮގްރާމަކާއި އިސްރަށްވެހީންގެ ހަވީރެއް 2025 އޮކްޓޯބަރ 4 ވަނަ ދުވަހު ވަނީ ބާއްވާފައެވެ. މި ހަވީރުގައި ނައިފަރު ކައުންސިލާއި، ޅ. އަތޮޅު ހޮސްޕިޓަލާއި، ނައިފަރު މެޑިކަލް ސެންޓަރ އަދި ނަޒާހެލްތް ފިޒިކަލް ރިހެބިލިޓޭޝަން ސެންޓަރުން ވަނީ ބައިވެރިވެފައެވެ. މިހަވީރުގައި އިސްރަށްވެހީންނަށް އަމާޒުކޮށް ތަފާތު އެކި ކުޅިވަރުތަކާއި ، ބަރުދަން ބެލުމާއި، ހަކުރު އަދި ބީއެމް.އައި ބެލުން ކުރިއަށް ގެންދެވިފައިވެއެވެ. މިހަރަކާތުގައި ނައިފަރުގެ ގިނަ އިސްރަށްވެހީން ބައިވެރިވެފައިވެއެވެ.

އިސްރަށްވެހިންގެ ދުވަސް 2025

އިސްރަށްވެހިންގެ ދުވަސް ފާހަގަ ކުރުން

މިނިސްޓްރީ އޮފް އިސްލާމިކް އެފެއަރޒްގެ ފަރާތުން ރައްޔިތުންނަށް އިސްލާމްދީނުގެ ޞައްޙަ މަޢްލޫމާތު ފޯރުކޮށްދީ ދީނީ ހޭލުންތެރިކަން އިތުރު ކުރުމުގެ ގޮތުން ޕްރޮގްރާމްތަކެއް ހިންގުމަށް ވަނީ ފައްޓަވާފައެވެ. މިގޮތުން ޅ. އަތޮޅަށް އަމާޒުކޮށް ހިންގޭ ޕްރޮގްރާމްގެ ދަށުން ނައިފަރު ކައުންސިލާއި، ޅ. އަތޮޅު ކައުންސިލް އަދި މަދްރަސަތުލް އިފްތިތާޙާއި މިނިސްޓްރީއޮފް އިސްލާމިކް އެފެއަރޒް ގުޅިގެން ނައިފަރުގައިވެސް މިދަރުސް ޕްރޮގްރާމް ހިންގުމަށް ވަނީ ހަމަޖެހިފައެވެ. 

ނައިފަރުގައި ދަރުސް ޕްރޮގްރާމް ފެށުމަށް ހަމަޖެހިފައިވަނީ 26 ފެބްރުއަރީ 2022 ވާ ހޮނިހިރު ދުވަހުއެވެ. މުއައްސަސާތަކަށާއި، ސްކޫލްގެ ދަރިވަރުން، ޢާއްމުންނަށް، ބެލެނިވެރިންނަށް އަދި މުދައްރިސުންނަށް އަމާޒުކޮށްގެން ނައިފަރުގައި ކުރިއަށް ގެންދިއުމަށް ހަމަޖެހިފައިވާ ދަރުސް ޕްރޮގްރާމްތަކުގައި މައިގަނޑު ގޮތެއްގައި މަޢުލޫމާތު ދިނުމަށް ހަމަޖެހިފައިވަނީ މުޖުތަމަޢު ބިނާކުރުމުގައި އިސްލާމް ދީނުގެ ދައުރު، މަޤާޞިދުއް ޝަރީޢާ، މާތްﷲ އަށާއި ކީރިތި ރަސޫލާއަށް އަދާކުރަންޖެހޭ ޙައްޤުތައް، މައިންބަފައިންގެ މައްޗަށްވާ ދަރިންގެ ޙައްޤުތައް، ދަރީންގެ މައްޗަށްވާ މައިންބަފައިންގެ ޙައްޤުތައް އަދި ސަބްޢުލް މޫބިޤާތު މި މައުޟޫޢުތަކުގެ މައްޗަށެވެ.

މި ޕްރޮގްރާމްގައި ދަރުސްތައް ދެއްވާނީ ރާއްޖޭގެ މަޝްޙޫރު ޢިލްމުވެރިން ކަމުގައިވާ މިނިސްޓްރީ އޮފް އިސްލާމިކް އެފެއާޒްގެ ވާޢިޘް  އައްޝައިޚް އަޙްމަދު ފަހުމީ ދީދީ އާއި އައްޝައިޚް ޙަސަން ތައުފީޤެވެ. 

މި ދަރުސް ޕްރޮގްރާމްގެ ތާވަލެއް ތައްޔާރުކޮށް، ޢާންމުންނާއި ހިއްސާކުރުމުގެ މަސައްކަތްތައް ދަނީ ކުރެވެމުންނެވެ. 

މީގެ ކުރިން ވެސް މިކައުންސިލުން ވަނީ މިފަދަ ޕްރޮގްރާމްތައް މިނިސްޓްރީ އޮފް އިސްލާމިކް އެފެއަރޒް އާއި ގުޅިގެން ކުރިޔަށް ގެންގޮސްފައެވެ

މިސްޓްރީ އޮފް އިސްލާމިކް އެފެއަރޒްގެ ފަރާތުން ޅ. އަތޮޅަށް އަމާޒުކޮށްގެން ދީނީ ހޭލުންތެރިކަން އިތުރު ކުރުމުގެ ޕްރޮގްރާމެއް ހިންގުމަށް ރާވައިފި

ނައިފަރުގައި ޢިމާރާތްކޮށްފައިވާ 100 ހައުސިން ޔުނިޓް، ޔުނިޓްތަކުގެ ހައްޤުވެރިންނާއި ޙަވާލުކުރުމުގެ މަސައްކަތް މިނިސްޓްރީ އޮފް ޕްލޭންނިންގ ހައުސިންގ އެންޑް އިންފްރާސްޓްރަކްޗަރގެ ބެލުމުގެ ދަށުން ނައިފަރުގައި ކުރިޔަށްގެންދަން ފަށައިފިއެވެ. 

100 ހައުސިން ޔުނިޓް ޢިމާރާތް ކުރުމުގެ ޕްރޮޖެކްޓް 2021 ނޮވެމްބަރ މަހުގެ ތެރޭގައި ނިމުމާއެކު، ހައުސިން ޔުނިޓްތަކަށް ކުރިމަތު ލުމުގެ ފުރުޞަތު 2021 ނޮވެމްބަރ 18 އިން ޑިސެމްބަރ 15 ވަނަ ދުވަހުގެ ނިޔަލަށް ވަނީ ކައުންސިލުން ޢާންމުކޮށް ހުޅުވާލައި، ފޯމް ބަލައިގަތުމުގެ މަސައްކަތް ކުރިޔަށް ގެންގޮސްފައެވެ. 100 ހައުސިން ޔުނިޓަށް ކުރިމަތިލުމަށް ހުޅުވާލި ފުރުޞަތާއި ގުޅިގެން ނައިފަރުގެ 802 ފަރާތަކުން ފޯމް ހުށަހަޅާފައި ވެއެވެ.

މި ހައުސިން ޔުނިޓް ދޫކުރުމަށް ކަނޑާއަޅާފައިވާ އުޞޫލުގެ ތެރެއިން، ހައުސިން ޔުނިޓަށް އެދި ހުށަހަޅާފައިވާ ފޯމްތައް އިވެލުއޭޓްކުރުމާއި މަޢުލޫމާތު ކަށަވަރުކުރުމުގެ މަސައްކަތް، ކައުންސިލުން ކަނޑައަޅާފައިވާ ހައުސިން ޔުނިޓް ކޮމެޓީގެ ބެލުމުގެ ދަށުން ވަނީ ކުރިޔަށް ގެންގޮސްފައެވެ. 

ސަރުކާރުގެ ބޯހިޔާވަހިކަމުގެ ދަށުން ނައިފަރުގައި 100 ހައުސިން ޔުނިޓް ޢިމާރާތްކޮށް، ބޯހިޔާވަހިކަން ބޭނުންވެފައި ތިބި 100 ޢާއިލާއަކަށް ބޯހިޔާވަހިކަމުގެ ފުރުޞަތު ލިބުނުކަމުގައި ވިޔަސް، ނައިފަރުގައި ތޮއްޖެހިފައިވާ ޢާއިލާތަކުގެ ބޯހިޔާވަހިކަމުގެ މައްސަލައަށް އެކަށީގެންވާ ހައްލެއް މި ހައުސިން ޔުނިޓްތަކުގެ ސަބަބުން އަދި ލިބިގެން ނުދާނެކަން، 2022 ފެބްރުއަރީ 19 ވަނަ ދުވަހު ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ނައިފަރަށް ކުރެއްވި ރަސްމީ ދަތުރުފުޅުގައި ވެސް ކައުންސިލުން ވަނީ ހިއްސާ ކުރައްވާފައެވެ. މިގޮތުން މިފަދަ ބޯހިޔާވަހިކަމުގެ ފުރުޞަތުތައް ނައިފަރަށް ހޯއްދަވާދެއްވުމާއި މެދު ވިސްނާވަޑައިގަންނަވާނެކަމުގެ އުއްމީދު ވެސް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވަނީ ދެއްވާފައެވެ.

ނައިފަރުގެ ރައްޔިތުންގެ ތެރެއިން 100 ޢާއިލާއަކަށް މިޕްރޮޖެކްޓްގެ ދަށުން ބޯހިޔާވަހިކަން ލިބިފައިވާތީ، އެކަން ފާހަގަ ކުރައްވާ ކައުންސިލުން ވަނީ ސަރުކާރަށް ޝުކުރު އަދާކުރައްވާފައެވެ. 

ހައުސިން ޔުނިޓްތައް އޭގެ ހައްޤުވެރިންނާއި ޙަވާލުކުރުމުގެ މަސައްކަތް ކާމިޔާބު ކަމާއެކު އަވަހަށް ނިންމުމަށް ޓަކައި މިނިސްޓްރީ އޮފް ޕްލޭންނިންގ ހައުސިންގ އެންޑް އިންފްރާސްޓްރަކްޗަރގެ ޓީމާއި ނައިފަރު ކައުންސިލުން ގުޅިގެން ދަނީ މަސައްކަތް ކުރައްވަމުންނެވެ.

100 ހައުސިން ޔުނިޓްގެ ހައްޤުވެރިންނާއި ޔުނިޓްތައް ޙަވާލުކުރުމުގެ މަސައްކަތް ފަށައިފި

ނައިފަރު ކައުންސިލްގެ ލޯގޯ، ދިދަ، ރަސްމީ ކިޓް އަދި އައު ވެބްސައިޓް 2022 ފެބްރުއަރީ 19 ވަނަ ދުވަހު އިފްތިތާޙް ކުރައްވާފިއެވެ. މި ލޯގޯ އަދި ވެބްސައިޓް އިފްތިތާޙް ކޮށްފައިވަނީ، 2022 ފެބްރުއަރީ 19 ވަނަ ދުވަހުގެ ރޭ 21:30 ގައި ނައިފަރު ކައުންސިލުން ބޭއްވި ހާއްޞަ ރަސްމިއްޔާތެއްގެ ތެރެއިންނެވެ. 

މިކައުންސިލްގެ ލޯގޯ، ދިދަ އަދި ރަސްމީ ކިޓް ފަރުމާކޮށް ހުށަހެޅުމާއި ގުޅޭގޮތުން ޢާންމުކޮށްފައިވާ މަޢުލޫމާތު ކަރުދާހުގައި ބަޔާންކުރާ މިންގަނޑުތަކުގެ ތެރެއިން ލޯގޯތައް އިވެލުއޭޓް ކުރުމުގެ މަސައްކަތް ކުރިޔަށް ގެންގޮސްފައިވަނީ ނައިފަރު ކައުންސިލްގެ އިދާރާގައި ތިއްބެވި އެކިއެކި ފަންނީ މުވައްޒަފުން ހިމަނައިގެން، ނައިފަރު ކައުންސިލުން ކަނޑައަޅާފައިވާ 09 މެމްބަރުން ހިމެނޭ ކޮމެޓީއަކުންނެވެ. މި ކޮމެޓީގެ ބޭނުމަކީ، ނައިފަރު ކައުންސިލްގެ އިދާރާގެ ރަސްމީ ލޯގޯ، ދިދަ އަދި ކިޓް ކަނޑައެޅުމަށްޓަކައި ކުރަންޖެހޭ އެންމެހާ މަސައްކަތްތައް ކުރިޔަށްގެންދިއުމެވެ. 

މިކޮމެޓީއިން ކުރިޔަށްގެންދިޔަ ލޯގޯ، ދިދަ އަދި ރަސްމީ ކިޓްގެ އިވެލުއޭޝަން ކާމިޔާބުކޮށްފައި ވަނީ ޅ. ނައިފަރު މުލީހާ ޞާލިޙް އިސްޙާޤް އެވެ. ނައިފަރު ކައުންސިލްގެ ލޯގޯ، ދިދަ، ރަސްމީ ކިޓް އަދި ވެބްސައިޓް އިފްތިތާޙް ކުރުމުގެ ރަސްމިއްޔާތުގެ ތެރެއިން،  ޞާލިޙް އިސްޙާޤް އާއި ހަނދާނީ ފިލައެއް އަރުވާފައި ވެއެވެ. މި ފިލައި އެފަރާތާއި ޙަވާލުކޮށްދެއްވާފައި ވަނީ، ރަސްމިއްޔާތުގެ ޝަރަފްވެރި މެޙްމާން، މިނިސްޓްރީ އޮފް ޕްލޭންނިންގ ހައުސިންގ އެންޑް އިންފްރާސްޓްރަކްޗަރގެ ޑެޕިޔުޓީ މިނިސްޓަރ ޢަލީ ޝާމިން އެވެ.

ނައިފަރު ކައުންސިލުން 2022 ފެބްރުއަރީ 19 ވަނަ ދުވަހު އިފްތިތާޙް ކުރައްވާފައިވާ ލޯގޯ ކައުންސިލްގެ ލިޔެކިޔުންތަކުގައި އަދި ކައުންސިލުން ހިންގާ ހަރަކާތްތަކާއި ރަސްމިއްޔާތުތަކުގައި މިހާރުވަނީ ބޭނުންކުރަން ފަށާފައެވެ.

ނައިފަރު ކައުންސިލްގެ ރަސްމީ ލޯގޯ، ދިދަ އަދި ކިޓް އިފްތިތާޙްކުރުމާއި ގުޅިގެން ރަށުގެ އިސްރަށްވެހިންނާއި، ޢާންމު ފަރާތްތަކުން ވަނީ ތަޢުރީފްގެ މެސެޖްތައް ލިބިގެން ގޮސްފައެވެ. މިގޮތުން ނައިފަރުގެ މަޝްހޫރު ލިޔުންތެރިއެއް ކަމަށްވާ އަދި ޅ. އަތޮޅު ކައުންސިލްގެ ރައީސްކަން ވެސް ކުރައްވާފައިވާ ޅ. ނައިފަރު ނަރުގިސްވާދީ، ރިޟްވާން ޢަލީ، މި ލޯގޯއާއި މެދު ވިދާޅުވެފައިވަނީ ލޯގޯގެ ބަހާތަކާއި، ލޯގޯގެ ސިފަކުރުން ކައުންސިލްގެ ޒިންމާތަކާއި އަދި ރަށާއި ވަރަށް ރަނގަޅަށް ގުޅުވާލެވޭ ކަމުގައެވެ. 

ނައިފަރު ކައުންސިލްގެ ލޯގޯ، ދިދަ އަދި ރަސްމީ ކިޓް ފަރުމާކޮށްފައި ވަނީ، ލޯގޯ ފަރުމާކުރުމުގެ މުބާރާތެއް ޢާންމުކޮށް ހުޅުވާލެވި ކަނޑައެޅިފައިވާ ވަކި މިންގަނޑުތަކެއްގެ ތެރެއިން ތައްޔާރުކޮށްފައިވާ މަޢުލޫމާތު ކަރުދާހެއްގެ މައްޗަށް ބިނާކޮށެވެ. މި މުބާރާތަކީ، 30000 (ތިރީސް ހާސް) ރުފިޔާގެ އިނާމެއް ކަނޑައެޅިގެން އިޢުލާން ކުރެވުނު މުބާރާތެކެވެ. މި މުބާރާތުގައި ބައިވެރިވުމަށް 3 ފަހަރެއްގެ މަތިން މިކައުންސިލުން އިޢުލާންކޮށްފައި ވެއެވެ. 

މިކައުންސިލްގެ ލޯގޯ، ދިދަ އަދި ރަސްމީ ކިޓް ފަރުމާކުރުމުގެ މުބާރާތުގައި ޖުމްލަ 20 ފަރާތަކުން 47 ޑިޒައިން އެއް ބައިވެރިކޮށްފައި ވެއެވެ. ހުށަހެޅިފައިވާ ޑިޒައިން ޕްރޮޕޯސަލްތައް ކައުންސިލުން ކަނޑައަޅާފައިވާ ކައުންސިލްގައި ތިއްބެވި ފަންނީ މުވައްޒަފުން ހިމަނައިގެން އެކުލަވާލާފައިވާ ކޮމެޓީއަކުން ދިރާސާކުރުމަށްފަހު 09 ޑިޒައިން ޕްރޮޕޯސަލްއެއް ޝޯޓްލިސްޓްކުރެވި، ޝޯޓް ލިސްޓް ކުރެވުނު ޑިޒައިންތަކުގެ ޑިޓެއިލް އިވެލުއޭޝަނެއް ހަދާފައި ވެއެވެ. 

ލޯގޯ އިވެލުއޭޓްކުރުމުގައި ނައިފަރާއި ލޯގޯ އާއި ހުރި ގުޅުމާއި، އެކަން ލޯގޯއެއްގެ ސިފައިގައި ގެނެސްފައިވާ ގޮތަށާއި، ލޯގޯ ކުރެހުމުގެ ހަމަތަކަށާއި، އެހެން މެޓީރިއަލްތަކާއި ޓެމްޕްލޭޓްގައި ލޯގޯ ހިމެނުމުން ފެންނަން ހުންނަ ގޮތަށާއި، ލޯގޯގެ ތަފާތުކަމާ ޙާއްޞަކަމަށް މާރކްސް ދީފައިވެއެވެ.

ނައިފަރު ކައުންސިލްގެ ލޯގޯ، ދިދަ، ރަސްމީ ކިޓް އަދި އައު ވެބްސައިޓް އިފްތިތާޙްކޮށްފި

ސަރުކާރުގެ ބޯހިޔާވަހިކަމުގެ ދަށުން ނައިފަރުގައި ޤާއިމްކޮށްފައިވާ 100 ހައުސިންގ ޔުނިޓް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް 2022 ފެބްރުއަރީ 19 ވަނަ ދުވަހު ނައިފަރަށް ކުރެއްވި ރަސްމީ ދަތުރުފުޅުގައި ނައިފަރު ކައުންސިލާ ހަވާލުކުރައްވައިފި އެވެ.

2022 ފެބްރުއަރީ 18 އިން 19 އަށް ރައީސުލްޖުމްހޫރިއްޔާ ޅ.އަތޮޅަށް ކުރެއްވި ރަސްމީ ދަތުރުފުޅުގައި، ނައިފަރަށް ކުރެއްވި ދަތުރުފުޅުގެ ތެރެއިން  މަދަރުސަތުލް އިފްތިތާޙްގައި އަލަށް އިމާރާތްކުރި 10 ކްލާސްރޫމާއި އޭވީ ރޫމްއާއި ސްޓާފްރޫމް ހިމެނޭ އިމާރާތް ރަސްމީގޮތުން ހުޅުވައިދެއްވަވާފައި ވެއެވެ. މީގެ އިތުރުން ނައިފަރަށް ކުރެވެވި ދަތުރުފުޅުގައި، ޅ. އަތޮޅު ކައުންސިލާއި، ޅ. ނައިފަރު ކައުންސިލާއި، ޅ. ނައިފަރު އަންހެނުންގެ ތަރައްޤީއަށް މަސައްކަތްކުރާ ކޮމެޓީ އަދި ޅ. އަތޮޅު ހޮސްޕިޓަލަށް ޒިޔާރަތް ކުރައްވާ އެތަންތަނުގެ މުވައްޒަފުންނާއި ބައްދަލުކުރައްވަވާފައި ވެއެވެ. އަދި މީގެ އިތުރުން ނައިފަރުގައި ޢިމާރާތްކޮށްފައިވާ ނައިފަރު ކައުންސިލްގެ އައު ޢިމާރާތަށް ޒިޔާރަތްކުރައްވާ، އެތަނުގެ މަސައްކަތްތައް ވެސް ރައީސުލްޖުމްހޫރިއްޔާ ވަނީ ބައްލަވާފައެވެ.

ޅ. ނައިފަރުގައި ސަރުކާރުން އިމާރާތްކޮށްފައިވާ 100 ހައުސިން ޔުނިޓް އެ ރަށުގެ ކައުންސިލާ ހަވާލުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ވިދާޅުވެފައިވަނީ، މި ހައުސިންގ ޔުނިޓްތަކުން ނައިފަރުގައި އެންމެބޮޑަށް ބޯހިޔާވަހިކަމަށް ބޭނުންވެފައިވާ ފަރާތްތަކުގެ ތެރެއިން ބަޔަކަށް ބޯހިޔާވަހިކަން ލިބިގެންދާނެކަމަށާއި ނަމަވެސް މިއީ އެތައް ޒަމާނެއް ކުރިން ފެށިގެން ނައިފަރަށް ދިމާވެފައިވާ ބޯހިޔާވަހިކަމުގެ މައްސަލަ މުޅިން ޙައްލުވެގެންދާނެ ކަމެއް ނޫންކަމުގައެވެ.

މި ބައްދަލުކުރެއްވުމުގައި ނައިފަރު ކައުންސިލުން ވަނީ ނައިފަރުގެ ތަރައްޤީއަށް އެންމެ މުހިންމު މަޝްރޫޢުތަކާއި ރައްޔިތުންގެ ހުރި ކަންބޮޑުވުންތައް ރައީސުލްޖުމްހޫރިއްޔާއާ ހިއްސާކުރައްވާފައެވެ. މީގެ އިތުރުން ހޮސްޕިޓަލުގެ ޚިދުމަތައް އިތުރުކޮށް ސްޕެޝަލިޓީ ޚިދުމަތްތައް ހުންނަން އެދޭކަމާއި މަގުހެދުމާއި ކުނި މެނޭޖްކުރުމުގައި ހުރި ދަތިތަކާއި ނައިފަރު މަދަރުސަތުލް އިފްތިތާޙަށް ކުރިމަތިވެފައިވާ ބައެއް ދަތިތަކާއި މަސްވެރިންނަށް އައިސްލިބުމުގައި ހުރި ދަތިތަކުގެ އިތުރުން ރަށުގެ އިޤްތިސާދީ އިޖްތިމާޢީ ތަރައްޤީއަށް މުހިންމުކަންތައްތައް ކައުންސިލުން ފާހަގަކުރައްވާފައި ވެއެވެ.

ނައިފަރުގައި ސަރުކާރުން އިމާރާތްކޮށްފައިވާ 100 ހައުސިން ޔުނިޓް ނައިފަރު ކައުންސިލާ ހަވާލުކުރައްވައިފި

ބައިނަލް އަޤްވާމީ އަންހެނުންގެ ދުވަސް (8 މާރޗް 2022) ކުލަގަދަކޮށް ފާހަގަ ކުރުމުގެ ގޮތުން ނައިފަރު ކައުންސިލުން ރަސްމީ ހަރަކާތްތައް މިއަދު ފަށައިފިއެވެ. މިގޮތުން ހަރަކާތްތައް ފެށިފައި ވަނީ ނައިފަރު ކައުންސިލްގައި މަސައްކަތް ކުރައްވާ ހުރިހާ ކަނބަލުންނަށް ބޭއްވުނު ހާއްޞަ ރަސްމީ ހަރަކާތަކުންނެވެ. އެގޮތުން މިއަދުގެ އޮފީސް ރަސްމީގަޑި ފެށިގެން ދިޔައީ، ކައުންސިލަރުންނާއި ކައުންސިލްގެ ފިރިހެން މުވައްޒަފުން އިންތިޒާމް ކޮށްގެން ބޭއްވުނު ހެނދުނުގެ ސަޔާއެކު ބޭއްވުނު ކުޅިވަރު ހަރަކާތްތަކަކާއި، ޓީމް ބިލްޑިންގ އަދި މޮޓިވޭޝަނަލް ޙަރަކާތްތަކުންނެވެ. ކަނބަލުންނަށް ޚާއްޞަ ކުރެވިގެން ތަފާތު މަޖާ ކުޅިވަރުގެ ޙަރަކާތްތަކާއެކު އުފާވެރި މާޙައުލެއްގައި ކުރިއަށް ގެންދެވުނު ހަރަކާތްތައް މިއަދު ނިންމާލެވުނީ ކަނބަލުންނަށް ހާއްޞަ ކޭކެއް ފެޅުމަށްފަހުގައެވެ. 

ކުރިއަށް އޮތް ހަފްތާ ތެރޭގައި ދުވަހާ ގުޅޭ އިތުރު ޙަރަކާތްތަކެއްވެސް ޢާއްމުންނަށާއި މުއައްސަސާތަކަށް ހުޅުވާލެވިގެން ކުރިއަށް ގެންދިއުމަށް ވަނީ ހަމަޖެހިފައެވެ. މިގޮތުން ޢާއްމުންނަށް ހުޅުވާލެވިގެން ބޭއްވޭ ކެއްކުމުގެ ކޯހަކާއި މުއައްސަސާތަކަށް އަމާޒުކޮށްގެން ބޭއްވޭ ބަށި މުބާރާތެއް ނައިފަރު ކައުންސިލާއި ނައިފަރު އަންހެނުން ތަރައްޤީއަށް މަސައްކަތްކުރާ ކޮމިޓީއާ ގުޅިގެން ބޭއްވުމަށް ވަނީ ހަމަޖެހިފައެވެ. އަދި މީގެ އިތުރުން ހިންނަވަރު ކޮމިއުނިޓީ ސެންޓަރުން އިންތިޒާމްކޮށްގެން ބާއްވާ އަންހެނުންގެ ވޮލީ މުބާރާތެއްގައި ނައިފަރު ޓީމެއް ބައިވެރިވުމަށްވެސް ވަނީ ހަމަޖެހިފައެވެ.

ނައިފަރު ކައުންސިލް ފާހަގަ ކޮށްލެވިފައިވަނީ ހީވާގި ކަނބަލުންތަކެއް މަސައްކަތް ކުރަމުންއަންނަ އިދާރާއެއްގެ ގޮތުގައެވެ. އަދި ދުވަހުގެ މުނާސަބަތުގައި ރާއްޖޭގެ ހުރިހާ ހިސާބެއްގައި އުޅުއްވާ ކަނބަލުންނަށް ދުވަހުގެ ތަހުނިޔާއާއި މުބާރަކްބާދީ ނައިފަރު ކައުންސިލްގެ ފަރާތުން އަރިސްކުރަމުންނެވެ.

ނައިފަރު ކައުންސިލުން އަންހެނުންގެ ދުވަސް ފާހަގަ ކުރުމުގެ ހަރަކާތްތައް ފަށައިފި

ޅ. އަތޮޅު ހޮސްޕިޓަލްގެ 58 ވަނަ އަހަރީ ދުވަސް ފާހަގަ ކުރުމުގެ ގޮތުން 11 މާރޗް 2022 ވަނަ ދުވަހު ބޭއްވުނު ކުޑަކުދިންގެ ހަވީރުގައި ނައިފަރު ކައުންސިލްގެ ފަރާތުން ބައިވެރިވެއްޖެއެވެ.

ޅ. އަތޮޅު ހޮސްޕިޓަލުން އިންތިޒާމްކޮށްގެން ނައިފަރުގައި ގާއިމްވެފައިވާ ބައެއް މުއައްސަސާތަކާ ގުޅިގެން ބޭއްވުނު މި ކުޑަކުދިންގެ ހަވީރު ބޭއްވުނީ ނައިފަރު ފުޓްބޯޅަ ދަނޑުގައެވެ. ތަފާތު ސްޓޯލްތައް ހިމަނައިގެން  ކުޑަކުދިންނަށް ޚާއްޞަކޮށްގެން އެކި އެކި މުނިފޫހިފިލުވުމުގެ ޙަރަކާތްތަކާ ކުޅިވަރުތައް ހިމެނޭގޮތަށް ބޭއްވުނު މި ޙަރަކާތަކަށް ޢާއްމުންގެ ފަރާތުންވަނީ ވަރަށް ބޮޑު ތަރުހީބެއް ލިބިފައެވެ. 

ނައިފަރު ކައުންސިލްގެ ސްޓޯލްގައި ހިންގުނު ޙަރަކާތްތަކުގެ ތެރޭގައި ކަރޯކޭ، ފޭސް ޕެއިންޓިންގ، މޭކަޕް ކުރުން، ނަސީބު ނަމްބަރު ހޮވުން  އަދި ޓްވިސްޓަރ ގޭމް ކުޅުން ކުރިއަށް ގެންދެވުމާއެކު ކޮންމެ ބައިވެރިއަކަށް ހަދިޔާއެއްވެސް ދެވުނެވެ.

ނައިފަރު ކައުންސިލްގެ ސްޓޯލަށް މިއަދު 200 އަށްވުރެ ގިނަ ކުޑަކުދިން ވަނީ ޒިޔާރަތް ކޮށްފައެވެ.

މި އަދު ބޭއްވުނު މި ކުޑަކުދިންގެ ހަވީރުގައި ޅ، އަތޮޅު ހޮސްޕިޓަލާއި، ނައިފަރު ކައުންސިލްގެ އިތުރުން ނައިފަރު ޕޮލިސް ސްޓޭޝަނާއި، މަރުކަޒުއް ތައިސީރުލް ޤުރްއާން ވަނީ ބައިވެރިވެފައެވެ. 

ހޮސްޕިޓަލްގެ އަހަރީ ދުވަހާ ގުޅިގެން ބޭއްވުނު ކުޑަކުދިންގެ ހަވީރުގައި ނައިފަރު ކައުންސިލުން ބައިވެރިވެއްޖެ

ޅ. ނައިފަރުގައި ހުރި މިސްކިތްތަކަކުގެ ބޮޑެތި މަރާމާތު ކުރުމުގެ މަސައްކަތްތަކާ އާބާތުރަ ފިލުވުމުގެ މަސައްކަތް ކައުންސިލުން ފަށައިފިއެވެ. މިގޮތުން ފުރަތަމަ ފެށިގެން ދާނީ މަސްޖިދުލްހާދީގެ މަރާމާތުގެ މަސައްކަތްތަކެވެ. މި މަރާމާތުތަކުގެ މަސައްކަތްތައް އަމިއްލަ ތަކެތީގައި ކޮށްދޭނެ ފަރާތެއް ހޯދުމަށް މިއަދު ވަނީ ޢިއްލާނު ކުރެވިފައެވެ.

މަސްޖިދުލް ހާދީގެ ފާރުތަކާއި އަދި ބެރިތަކުގައި އަޅާފައިވާ ބޮޑެތި ރެނދުތައް މަރާމާތު ކުރުމާއި، ފުރާޅުން ފެން ލީކުވުމުގެ މައްސަލައާއި އަދި ސީލިން މަރާމާތު ކުރުމުގެ މަސައްކަތް މީގެ ތެރޭގައި ހިމެނެއެވެ.

މި މަސައްކަތްތައް ކޮށްދެއްވަން ޝައުގުވެރިވާ ފަރާތްތައް މިއަދު ހަވީރު 17:00 ގެ ކުރިން ކައުންސިލް އިދާރާއަށް އަގު ހުށަހެޅުމަށް ވަނީ ހުޅުވާލެވިފައެވެ. އަގު ބަލާ ފޯމް ނައިފަރު ކައުންސިލްގެ އިދާރާއިން އަދި ތިރީގައިވާ ލިންކުން ލިބިވަޑައިގަންނަވާނެއެވެ. 

https://drive.google.com/file/d/1dF-xkfhPA9yR7EVH1o5OAjOq9lsCRUC6/view

ނައިފަރުގައި ހުރި ގިނަ މިސްކިތްތަކުގައި ކުރަން ހުރި ބޮޑެތި މަރާމާތުތައް ކައުންސިލަށް ފާހަގަ ކުރެވި އެމަސައްކަތް ފެށިފައިފައިވާ މިދަނޑިވަޅުގައި، ކައިރި މުސްތަޤްބަލެއްގައި މަސްޖިދުއްތަޤްވާގެ މަރާމާތުތައް ކުރުމަށް ވެސްވަނީ ކައުންސިލުން ނިންމާފައެވެ.

މިސްކިތްތަކުގެ އާބާތުރަ ފިލުވުމުގެ މަސައްކަތްތައް ކައުންސިލުން ފަށައިފި

ނައިފަރު އަންހެނުން ތަރައްޤީއަށް މަސައްކަތް ކުރާ ކޮމިޓީއިން އިންތިޒާމްކޮށްގެން، ނައިފަރު ކައުންސިލްއާއި ޖުވޭރިޔާ ވަޖުދީ ގުޅިގެން ނައިފަރުގައި ކައްކާ ކޯހެއް ފެށިގެން އެބަ ކުރިޔަށް ދެއެވެ. މި ކޯސް ކުރިއަށް ގެންދަނީ 18 މާރޗް އިން 24 މާރޗް އަށެވެ.

ކޯހުގައި ކިޔަވާ ދެއްވަނީ މަޝްހޫރު ކެއްކުންތެރިޔާ ޖުވޭރިޔާ ވަޖުދީ އެވެ. ޖުމްލަ 40 ބައިވެރިންނާއެކު ކުރިއަށް ގެންދާ މިކޯހުގައި ބައިވެރިންގެ ވަރަށް ބޮޑު ތަރުހީބެއް ލިބެމުންދެއެވެ. "ކޯސް ކުރިއަށްދަނީ ވަރަށްވެސް ހިތްހަމަޖެހޭ އެކުވެރި މާޙައުލެއްގައި، ބައިވެރިންގެ ގުޅުމާ އެހީތެރިކަން ވަރަށް ބޮޑަށް ލިބިގެން ނެވެ. އަދި މިކޯސް ހިނގަމުންދާއިރު "މިހާތަނަށް 240 އަށްވުރެ ގިނަ ބާވަތުގެ ތަކެތި ހަދަން ދަސްކޮށްދެވިއްޖެ" ކަމުގައި ޖުވެއިރިޔާ ވިދާޅުވިއެވެ. ކޯހުގެ ބައިވެރިން މިހާތަނަށް ދަސްކޮށްފައިވާ ބައެއް ބާވަތްތަކުގެ ތެރޭގައި؛ ތަފާތު ވައްތަރުގެ ފްރައިޑް ރައިސް، ކަރީސް، ތަންދޫރީ، ޑެސަރޓް، ތަފާތު ވައްތަރުގެ ޖޫސް، ޕާސްތާ އަދި ޕޭސްޓްރީގެ ތަފާތު ބާވަތްތަކުގެ އުފެއްދުންތައް ހިމެނެއެވެ

ނައިފަރު މަލްޓިޕާޕަސް ބިލްޑިންގގައި ކުރިއަށް ގެންދާ މި ކޯސް، 8 ދުވަހުގެ މުއްދަތަށް ކުރިއަށް ގެންދިއުމަށް ވަނީ ހަމަޖެހިފައެވެ. 

ޖުވޭ ވިދާޅުވެފައި ވަނީ ރަށްރަށުގައި ހެދޭ ފަތްޕިލާވެއްޔާއި ފަލަމަޑިގޮވާމުގެ ބާވަތްތައް ބޭނުން ކޮށްގެން މީގެ ކުރިން ވެސް އޭނާ ވަނީ އެކިރަށްރަށުގައި މިފަދަ ކޯސްތައް ހިންގާފައިވާނެ ކަމުގައެވެ. އަދި މިހާރުވެސް އިތުރު ރަށްރަށުގައި ކޯސްތައް ހިންގުމުގެ ފުރުސަތު ލިބިފައިވާ ކަމަށާއި، ވަގުތު ލިބޭ މިންވަރަކުން އެރަށްރަށަށް ގޮސް ކެއްކުމުގެ ހުނަރު ދަސްކޮށްދިނުމަށް ކޯސްތައް ކުރިޔަށް ގެންދިއުމުގެ މަސައްކަތްތައް މިހާރުވެސް ރާވަމުން ގެންދަވާ ކަމަށް ވިދާޅުވެފައި ވެއެވެ. 

މި ކޯހަކީ ނައިފަރު އަންހެނުން ތަރައްޤީއަށް މަސައްކަތް ކުރާ ކޮމިޓީއިން އިސްނަގައިގެން ހިލޭ ސާބަހަށް ހިންގޭ ކޯހެކެވެ.

ފަހުގެ ޚަބަރުތައް

ހުރިހާ ޚަބަރުތައް

ފާދިއްޕޮޅު ނައިފަރު ކައުންސިލްގެ އިދާރާ

ކައުންސިލްއާއި ގުޅުއްވުމަށް